Staġun 2008-2009

Il-51 Staġun ta’ Nadur Youngsters  - 08/09   -1 ħarġa 

Fejn Ser Naslu??

                Fl-aħħar tlett Staġuni, li fihom bħala Club ta’ Nadur Youngsters, ilħaqna l-objettivi li ħdimna għalihom, fosthom:

• Ir-Rebħa ta’ tlet Kampjonati konsekuttivi biex bihom ukoll ksibna l-iStilla
• Tlestija ta’ Faċilitajiet Sportivi u Pitch bit-Turf Artifiċċjali fil-Peter Paul Camilleri Ground
• Rinnovazzjoni tal-Bottegin tal-Club.

 Kienu tlett snin li bihom, flimkien, għandna biex inkunu sodisfatti u kburin.  Issa wasal iż-żmien li jkollna Ħolm Ġdid, Objettivi Ġodda u fuq kollox Motivazzjoni Ġdida.  Dawn huma it-tlett punti li nemmen li KULL membru ta’ Soċjeta għandu jkollu jekk verament ikun irid il-ġid tas-soċjeta li jkun membru tagħha.  

Mumenti Diffiċċli               

                Wara li spiċċaw il-festi tal-50 Anniversarju tal-Youngsters bdejna insibu ħafna problemi li ġeneralment huma normali,  u li kull soċjeta f’xi żmien jew ieħor tgħaddi minnhom.  Żmien illi kieku ma kienx hemm l-għaqal, seta’ jkisser dak kollhu  li bnejna fl-aħħar snin.  Diżgwid bejn il-membri tal-Kumitat, players li ma qablux ma ċerti deċizzjonijiet, kultant iebsa, li ttieħdu għal ġid tal-Club.  Iddiskutejna fit-tul u wara ħafna qtiegħ il-qalb, b’maturita ħadna dawk id-deċiżjoniiet li l-ewwel u qabel kollox huma fl-aħjar interess tal-Club.  It-tlett punti prinċipali fil-programm li fassal il-Kumitat għal dan l-istaġun huma:

• Insaħħu l-Finanzi tal-Club
• Nibnu team  b’Talent Naduri
• Għaqda u Dixxiplina li tissarraf f’aktar rebħ ta’ Unuri

Insaħħu l-Finanzi tal-Club               

               Waħda mill-prijoritajiet li għandu l-Club hija li joħroġ miż-żona l-ħamra.  Hu ta’ sodisfazzjon li fl-aħħar staġuni mxejna bi programm fejn tħallsu ħafna kontijiet pendenti li kellna mill-istaġuni ta’ qabel.  F’Laqgħa Ġenerali kont elenkajt, li fi żmien 4 snin irridu nġibu l-Finanzi tal-Club fis-sod.  Il-pożizzjoni tal-Club illum hija din:

• Fuq Proġetti Kapitali, il-Club għandu dejn ta’ €30,000 (tletin elf Ewro).
• Fuq l-Affarijiet tat-team, li jmorru lura sal-1994, il-Club għandu dejn ta’ €18000 (tmintax- il elf Ewro)

 Meta wieħed iħares lejn dawn iċ-ċifri, irid iżomm quddiem għajnejh li l-Club għamel investiment Kapitali ta’ l-fuq minn €250000 (mitejn u ħamsin elf Ewro).  Apparti il €35000 (ħamsa u tletin elf Ewro) li ġew mill-Fond tal-Kaqżi Ġusti, l-oħrajn kellhom jiġu minn Sponsorships, kera tal-Bottegin, Attivitajiet ta’ Fund Raising u Donazzjonijiet.  L-objettiv tal-Club huwa li fi żmien 3 snin jitħallas kollox.  Din hija sfida kbira, u mhux faċli, imma nemmen li flimkien naslu.  Dan ikun l-akbar suċċess li nistgħu nilħqu fit-tlett snin li ġejjin.  

Nibnu Team b’Talent Naduri               

                Kien ilu jberren f’moħħ il-Kumitat li wasal iż0-żmien li nibnu team b’talent Naduri.  Ma kienx faċli li tieħu deċiżjoni, imma ġie deċiż li għall-istaġun 2008-2009 il-Club iżomm lil Aleksandar Simoncic, kienu reġistrati żewġ players barranin ġodda li huma Branislav Timotic u Ivo Ginev, filwaqt li l-kumplament ta’ l-iskwadra huma kollha players li ħarġu min Nursery tal-Club tagħna.  It-Team ser ikompli ikum immexxi minn Mario Bonello u Salvu Rapa.                L-Appell tiegħi hu li nagħtu l-appoġġ kollhu meħtieġ u kontinwament sabiex dan it-team jimmatura u jsir l-akbar forza fil-football lokali.  Il-fatt li ġew żewġ riżultati negattivi m’għandux jaqtalna qalbna.  Perzważ li r-riżultati jibdew ġejjin.  Ejjew niġbdu ħabel wieħed.  Kuraġġ flimkien naslu. 

Nirbħu aktar Unuri               

        Għadu kmieni biex wieħed jibda jagħmel analiżi tas-saħħa u l-potenzjal tat-timijiet fl-ewwel divizjoni.  Ħafna huma ta’ l-ideja li dan l-istaġun ser ikun taqtija sħiħa għall-kampjonat, fejn Victoria Hotspurs jibdew favoriti.  Pero żgur li dan l-istaġun jista jiġi missielet possibilment bejn erbgħa jew ħames timijiet għar-rebħ tal-Unuri.  Dan jista ifisser telf ta’ ħafna punti u kulħadd jista jispiċċa biex jirbaħ il-Kampjonat.                Rigward it-timijiet l-oħta ta’ Nadur Youngsters, l-Under 21, l-Under 16 u l-Under 14 għandhom ikunu fost il-favoriti, waqt li mit-team tat-tfajliet qed nistennew li mmorru aħjar mill-istaġun li għadda.               

 Dan kollhu hu awgurju biex inkomplu inżidu l-Unuri fil-Club tagħna.

 -------------------------------------

Il-Fixtures tal-First team ta’ l-Ewwel u t-Tieni Round kif ukoll l-ewwel partita għat-Tazza GFA huma dawn: 

Nagħtu s-SAPPORT lil BENJAMINI tagħna

Membership u Donazzjonijiet

                Il-Membership għall-istaġun 2008-2009 bdiet tinġabar.  Din is-sena għandna novita li nittama li tkun waħda pożittiva.  Il-membershiup ser ikun hekk:

• Membru Ordinarju  €20 (għoxrin Ewro) – kif ġiet approvata fl-aħħar Laqgħa Ġenerali Annwali.
• *Silver Member   €50 (ħamsin Ewro)
• *Gold member    €100 (mitt Ewro)

                Hija t-tama tagħna li minn din l-iskema ndaħħlu s-somma ta’ €7000 (sebat elef Ewro) li tkopri xagħrejn mill-ispejjeż kurrenti li jkollu l-Club.  Napprezzaw ukoll kull donazzjoni u nirringrazzjawkom bil-quddiem tal-koperazzjoni tagħkom.

Attivitajiet

 27 ta’ Settembru 2008                              Tombla Speċjali  fis-Sala parrokkjali 

28 ta’ Settembru 2008                              Ħarġa Malta 

29 ta’ Ottubru 2008                                   High Tea   fis-City Pearl, Victoria 

20 ta’ Diċembru 2008                                Ikla tal-Milied  f’Ta’ Ċenċ Hotel 

23 ta’ Diċembru 2008                                Coffee Morning Speċjali tal-Milied  fis-City Pearl, Victoria

  Kompetizzjoni tal-Boċċi

                Hemm il-ħsieb li f’Ottubru u Novembru ssir Kompetizzjoni tal-Boċċi.  Dawn Interessati jkellmu lil Pawlu Sultana.

Lotterija Bieb-Bieb               

F’Ottubru u Novembru, membri tal-Kumitat ser joħorġu jqassmu l-Ktieb ‘CHAMPIONS għall-GĦAXAR DARBA’ u fl-istess waqt ser jitolbukom donazzjoni għall-Club, li ser tkun abbinata ma Lotterija f’Katina tad-Deheb. Nittama li l-Informazzjoni li wassaltilkom kienet ta’ Interess.  Il-Kumitat ser ikompli jaħdem għall-ġid tal-Football fin-Nadur u biex isem il-Youngsters ikompli jingħata l-gieħ li jixraqlu.